حفظ النعناع الاخضر
ده فيديو للوصفة كاملة بالتفصيل👇 الطريقة كاملة مكتوبة تحت برده😘
مقدمة
النعناع من الحاجات اللي احنا بنحتاجها اذا كان في الاكل او في المشروبات وناس كتير مننا ما تعرفش الوقت الصحيح علشان تجفف النعناع ويكون معاك مجفف و ريحته طازة عشان كده النهارده هقولك ازاي تجففي النعناع من السنه للسنه وتحولي من الصوره الخضراء الى انه يبقى ناشف معاكى ولا يسوف ولا يرطب وكمان هيفضل معاك بنفس الجوده تعالي اقولك ازاي ننشفه بطريقه سهله وبسيطه يلا بينا
الطريقة
شهر خمسه من الشهور اللي تقدري تخزني فيها حاجات كتير اوي وهتنفع في اوقات كتير في السنه واللي من ضمن الحاجات دي بيكون النعناع عشان في الوقت ده بيكون ورقه كبير وكمان بتكون ريحته نفاذه جدا وتقدري من كميه بسيطه تقدري تشيلي منه كميه تكفيكي طول السنه واحسن نوع نعناع للتجفيف هو الفوليه عشان ورقه بيكون كبير وريحته المميزه اللي بتكون قويه وكمان حجم الورقه كبير ولم بينشف بتقدري تحوليه بودر زي ما انتى جابه ودلوقتى هنعمل منه كميه وهنشوف هتطلع كميه قد ايه دلوقتي اول حاجه هنعملها اننا هنقطف ورق النعناع انا بجفف ورق النعناع بس من غير العيدان عشان استخدامه في الاكل والمشروبات بيكون اكتر انما العيدان مش هتنفعني اوي لانها في الاخر بتكون عامله زي القش ولو حطيتيها في الاكل بتكون ظاهره وما بتكونش محببه دلوقتى بعد ماخلصنا الكمية كلها هنغسلها كويس جدا زى الملوخية وهنسيبها فى المصفاة لمدة ربع ساعة وبعد كده هنجهز صينية كبيرة وهنفرش عليها قماشة وهنبدأ نفرش عليها النعناع ونسيبها فى حتة متهوية كويس و كمان بيدخلها شمس وهتسيبيه كده وكل يوم هتقلبيه لحد ماينشف معاكى خالص ولو فرقتيه بإيدك هتلاقيه بيتحول بودر وبس كده هو هيفضل معاكى طول السنة
وبألف هنا وشفا بتمنى الوصفة تعجبكم 😊
دمتم بخير 🥰😊