ممبار
ده فيديو للوصفة كاملة بالتفصيل👇 الطريقة كاملة مكتوبة تحت برده😘
المقدمة
من اشهر الوصفات على سفرتنا في الاعياد او في العزومات او لو عندنا ضيف بتكون المحاشي
المحاشي طبعا بيكون لها اشكال كتير فان شاء الله هنعمل معكم اشهرها وهو الممبار هعرفك ازاي تطلعي الشوربه دسمه بالشكل اللي انت شايفاه ده وكمان تعمليه بطريقه سهله وبسيطه وكمان ازاي تقدري تختاري الممبار البلدي من الممبار الصيني وكمان هعرفك ازاي تخلي الرز بتاعه مفلفل وكمان ما تخليهوش يفرقع في الشوربه
المقادير
ممبار بلدى
رز
كزبره خضرا
بقدونس
شبت
نعناع
3 طماطم مبشوره
بصله مفروم
ملح (حسب الرغبة)
نص معلقة صغيرة فلفل اسود
نص معلقة صغيرة شطة
مياه
زيت
الطريقة
اول حاجة فى اكلتنا النهارده هو نوع الممبار وطبعا زي ما احنا عارفين ان السوق فيه نوع بلدي ونوع صيني والنوع البلدي طبعا بيكون منقسم لكذا حاجه نوع بتلو ونوع ضاني ونوع شمبري هنعرف البلد ازاي من الدهون اللي بتكون موجوده على اجناب الممبار انما الصيني ما بيكونش فيه اي دهون تماما طبعا من ناحيه الاكل فالاطعم والاحلى هو الممبار البلدي اللي طبعا بتكون دهونه على الاجناب كل انواع الممبار البلدي بيكون فيها دهون كده على الاجناب مختلف فيها حاجه واحده بس وهو الحجم كل نوع بيكون له حجمه مختلف دلوقتى احنا هنعمل الخلطه والخلطه دي كميتها طبعا راجعالك
معايا كده رز هنضيف خضره محشي هي عباره عن كزبره وبقدونس وشبت ونعناع ولو ما اتوجدش عندك نعناع وعندك نعناع اخضر هو بيفي بالغرض جدا بعد كده هنضيف ثلاثه طماطم مبشورين وبصله مفرومه وملح (حسب الرغبة) و نص معلقه فلفل اسمر
نص معلقه شطه وهنبدأ نقلبهم لحد مايتخلطوا كويس وطبعا الخلطه دي انا عامله الكميه اللي تكفي الممبار اللي انا عاملاه انما انت لو عامله كميه كبيره هتزودي طبعا على حسب الكميه اللي انت عاملاها
دلوقتي هقولك على طريقه سهله علشان تحشي بها الممبار بسرعه هتجيبي محقن (قمع) ومعلقه على قد فتحه المحقن (القمع) دي تعتبر اسهل طريقه واسرع طريقه ان انت تعملي بها الممبار هتجيبى الممبار كده وهنكون طبعا غاسلينه من قبلها وقصينا على قد المقاس اللي احنا حابينه بس كبري المقاس شويه صغيره علشان هو بيكش شويه فيديك المقاس المطلوب اللي انت بتحبي تاكليه دلوقتي احنا لبسناه كده للقمع وهنحط كميه الرز وهنبدا ننزل بالمعلقه تفضلي تضغطي كده وهو هيتملى معك وبسرعه اهم حاجة انك ماتحشيهوش اوي وتكبسيه رز علشان مايفرقعش منك في الشوربه انت هتساويه كده بالراحه مجرد ان هو يكون مبطط بس في فراغات كده علشان لما يكش ويضم هيكون كده هو اتملى ملوى الصح بتاعته ليه لما بتحشيه عن كده او اكتر من كده بيفرقع معاكى في الشوربه
في الوقت ده انا كنت حاطه حله فيها مياه على النار سبتها تغلي ودلوقتي هنزل فيها الممبار وانت بتنزليه لازم تكوني حذره ان انت تبقي ماسكه الفتحتين بطول لفوق كده علشان اول ما ينزل يبدا يضم من تحت ويقفل على الرز دلوقتى هنضيف الملح (حسب الرغبة) دلوقتي هنسيبه يغلي ويا ريت وهو بيغلي عشان يستوي ما تحطيش في المعلقه تماما علشان خاطر المعلقه ما تجرحش الممبار و يتفتح ويطلع الرز منه هو تمام كده استوى
بالنسبه للقلي انت لو مش حابه تقلي حطيه في الاير فراير لو حابه تحطيه في الفرن برضو ينفع بس بيطلع معاكى ناشف شويه ان هو بيكون مقلي بس في ناس ممنوعه منهم القلي والزيوت فاحنا بنعمله في الاير فراير او بنعمله في الفرن بس تحاولي تتابعي علشان ما ينشفش منك وبس كده هو جاهز على التقديم
وبألف هنا وشفا بتمنى الوصفة تعجبكم 😊
دمتم بخير 🥰😊