تارت كنافة بالكاسترد وصوص الشيكولاته
.jpg)
ده فيديو للوصفة كاملة بالتفصيل👇 الطريقة كاملة مكتوبة تحت برده😘
مقدمة
الكنافه من الحلويات الاساسيه في رمضان ودايما بيكون لها اشكال كتير واحنا حابين نعملها النهارده معاكم بشكل غير تقليدي وسهل وسريع ومش هيأخد معك وقت خالص
المقادير
ربع كيلو كنافة مجمدة
ثلث كوب سكر ناعم
رشة فانيليا
ثلث كوب سمنة او زبدة
كوب لبن
ملعقة كبيرة بودرة كاسترد
ملعقة كبيرة سكر
صوص شوكولاتة
الطريقة
معايا كده ربع كنافه متجمده وطبعا بنجمدها من قبلها علشان لما نطحنها في الكبه تكون مفرومه ناعم هنضيف عليها ثلث كوبايه سكر ناعم و رشة الفانيليا وهنقلب الكنافه كويس جدا دلوقتى هنضيف ثلث كوب سمنه ويفضل تكون سمنه بلدي علشان تبقى الريحه بتاعتها قويه ومختلفة هنجيب صينيه تارت ويفضل يكون من النص فيها حافه داخله شويه هننزل فيها الكنافه وهنضغط على الكنافه ونساويها لحد ما هتأخد شكل التارت بالظبط ودلوقتى هدخلها الفرن على درجه 200 وبعد ماتجهز وتأخد لون دهبى هنسيبها تبرد شوية ونقلبها فى طبق
ودلوقتى هنجهز الكاستر فى كسرولا هنضيف كوب لبن وهنضيف عليه معلقة كاستر ومعلقة سكر وهنقلبهم على البارد وبعدين على نار هادية مع التقليب المستمر لحد ماتوصل لسٌمك تقيل شوية وهنبدأ نضيف الكاستر على تارت الكنافة وهنبدأ نزيينها بصوص الشوكولاتة وهنسيبها تبرد وندخلها التلاجة تتماسك وكده تكون جاهزة للتقديم
وبألف هنا وشفا بتمنى الوصفة تعجبكم 😊
دمتم بخير 🥰😊