العاشورا بكل اسرارها
ده فيديو للوصفة كاملة بالتفصيل👇 الطريقة كاملة مكتوبة تحت برده😘
مقدمة
من العادات المتعارف عليها عند اغلب الناس ان كل موسم اوعيد او مناسبه بيكون ليها طقوس معينه واكله معينه ودلوقتى موسم العاشوراء واشهر حاجة فى الموسم ده هي العاشوراء هنعملها بطريقه سهله وبسيطه وكمان طريقه هتعتمدها
المقادير
3.5 اكوب ماء
كوب غلة (قمح مقشور)
2 كيلو لبن كامل الدسم
كوب سكر
رشة فانيليا
5:6 ملعقة كبيرة نشا
ملعقة ماء ورد
الطريقة
كوباية مياه وهنحطهم على النار يغلوا لحد ما يكونوا معنا بالشكل ده هنضيف لهم كوبايه غله مغسوله هنقلبهم ونسيبهم على النار يغلوا عشر دقايق والخطوه دي مهمه جدا علشان الغله معنا تستوي لان لو ما عملتيش الخطوه دي الغله هتاخد معك اكتر من ساعتين او ثلاث ساعات على النار دلوقتي غليناها عشر دقايق وهنطفي عليها النار وهنغطيها بغطاء وبعد ربع ساعه هتلاقيها حجمها زاد وفشرت بس لسه مستوتش (لم تنضج) وكمان هتلاحظى انها شربت المياه كلها دلوقتى هنضيف كوبايتين مياه ونسيبها تغلى على النار من ربع ساعة لحد ماتحسى ان حباية الغلة استوت (نضجت) واهم حاجة تقلبيها كل شوية علشان متلزقش و دلوقتي هنضيف لها اتنين كيلو لبن كامل الدسم وهنضيف كوباية سكر وطبعا كمية السكر حسب الكمية المناسبة ليكى وهنضيف رشة فانيليا بودر وهنقلبهم
ودلوقتى هنجيب نص كوباية مياه وهنضيف عليه من 5 ل 6 ملاعق كبيرة نشا على حسب نوع النشا اللي انت بتستخدميه وهندوبهم فى المياه ونبدأ نضيفهم على العاشورا وطبعا هنقلب واحنا بنضيفهم علشان ميحصلش تكتلات من النشا وهنقلب بأستمرار لحد مايوصل لقوام كريمى تقيل شوية
واخر خطوة ودى اختيارى هنضيف ملعقة ماء ورد بتدى ريحة وطعم مميز للعاشورا
ودلوقتى هنبدأ نوزعهم على الكوبايات او السلاطين ونسيبهم يبردوا وندخلهم التلاجة وكده يكون جاهز معانا
وبألف هنا وشفا بتمنى الوصفة تعجبكم 😊
دمتم بخير 🥰😊