مخلل الفلفل الحار
ده فيديو للوصفة كاملة بالتفصيل👇 الطريقة كاملة مكتوبة تحت برده😘
مقدمة
فى موضوع النهارده هعمل معاكم مخلل الفلفل وهو من اشهر المقبلات اللي بتكون موجوده على كل سفره ورغم ان طريقته سهله وبسيطه بس في ناس ما بتعرفش تعمله صح وفي ناس بيهبط معاها وما بيطلعش بالقرمشه اللي احنا متعودين عليها من المحلات يالا نعمله بكل خطواته
المقادير
فلفل اخضر حار
فص ثوم
ملعقة كبيرة ملح
ملعقة كبيرة خل
مياه
الطريقة
انا النهارده هعمل معاكم مخلل الفلفل على الفلفل الحار او الحراق بس الطريقه دي تقدري تعمليها على الفلفل البارد وعلى الفلفل الوسط اول حاجة هنعملها هنغسل الفلفل كويس جدا هنبدأ نشيل القمع وننضف الفلفل ونبدأ بالسكينة نعمل خرم بسيط فى الفلفل عشان مياة التمليح تدخل جواه وهنجيب علبة او برطمان ونبدأ نرص فيه الفلفل
ودلوقتى هنجهز مياة التمليح معايا بولة فيها مياه هنضيف عليها ملعقة كبيرة ملح او حسب الكمية الى هتملحيها المهم المياه تكون ملحها عالى شوية وهنضيف فص ثوم مفروم وملعقة كبيرة خل وطبعا عشان ده فلفل حراق مش هضيف شطة بس لو هتعملى فلفل بارد هتضيفى ملعقة شطة عشان طعمه يظبط وبس كده هنقلب المياه لحد الملح مايدوب خالص وهنبدأ نملى برطمان الفلفل بالمياه الى حضرناها لحد اول البرطمان لازم يغطى الفلفل كله وهندخله التلاجة و فى خلال ثلاثة ايام هيكون جاهز معانا وطبعا لازم عشان تحافظى عليه ميهبطش تدخليه التلاجة
وبألف هنا وشفا بتمنى الوصفة تعجبكم 😊
دمتم بخير 🥰😊