مكرونة بشاميل باللحمة المفرومة
ده فيديو للوصفة كاملة بالتفصيل👇 الطريقة كاملة مكتوبة تحت برده😘
المقدمة
دايما على سفرتنا في الاعياد او المناسبات او لو عندنا اي ضيف بيكون في صنف اساسي لا غنى عنه وهو المكرونه بشاميل هعرفك فى موضوع انهاردة سر من اسرار البشاميل الكريمي ودسم وكمان الطبقات تكون معك مظبوطه
مقادير المكرونة
500 جرام مكرونة
مقادير العصاج
500 جرام لحم مفروم
2 بصلة مفرومة
نصف ملعقة شطة
نصف ملعقة فلفل اسود
نصف ملعقة زعتر
ملح (حسب الرغبة)
نصف ملعقة بهار مخصوص
نصف كوب ماء
مقادير البشاميل
3 ملعقة كبيرة زبدة او سمنة
كوب دقيق
لتر لبن كامل الدسم
2 ملعقة كبيرة قشطة
نص لتر ماء او شوربة
ملعقة فلفل اسود
نصف ملعقة شطة
ملح (حسب الرغبة)
الطريقة
اول حاجة هنبدأ نحضر المكرونة فى حلة على النار هنضيف مياه وعليها ملح ونسيبها لحد ماتغلى وهنضيف 500 جرام مكرونة ونقلبهم تقليبة ونسيبها لحد ماتستوى سوى الا ربع ونصفيها من المياه
بعد كده هنبدأ نحضر العصاج فى حلة هنضيف اللحمة المفرومة وعليها بصلتين مفرومين وهنضيف البهارات نصف ملعقة شطة ونصف ملعقة فلفل اسود و نصف ملعقة زعترو ملح (حسب الرغبة) ونصف ملعقة بهار مخصوص وهنضيف نصف كوب ماء ونقلبهم عشان اللحمة متكتلش وبس كده هنسيبهم على نار متوسطة لحد ما اللحمة تستوى وبس كده تكون جاهزة
دلوقتى هنحضر البشاميل فى حلة على النار هنضيف من 3 ل 4 معالق كبار زبدة او سمنة وهننزل عليها بكوب دقيق ونقلب لحد ما الدقيق يظهر فيه ريحة تحمير
ملحوظة : لازم كمية الزبدة او السمنة تكون مناسبة مع كمية الدقيق بحيث الدقيق يكون مندمج مع الزبدة وتكون سايلة ومفيش تكتلات خالص
واول ما لونه يبيض وتظهر ريحة التحميره هتنزلى عليه لتر لبن وهنقلب بأستمرار عشان ميبقاش فى تكتلات ودلوقتى هنضيف معلقتين كبار قشطة و دى اختيارى بس بتضيف نكهة ودسامة للبشاميل هنقلب كويس لحد ما القشطة تدوب فى البشاميل وهنضيف نص لتر مياه او شوربة او مياة سلق المكرونة وهتفضلى تقلبى عشان البشاميل مع السخونية بيتخن ودلوقتى هنضيف البهارات ملح حسب الرغبة و معلقة فلفل اسود ونص معلقة شطة ونقلب كويس عشان يندمجوا وبس كده يكون البشاميل جاهز معانا وملمسه كريمى كمان
دلوقتى هنشيل جزء من البشاميل فى بولة عشان وش الصينية وباقى البشاميل هننزل فيه المكرونة المسلوقة وهنقلب كويس الخطة دى عشان البشاميل يوصل لكل المكرونة عشان المكرونة متبقاش ناشفة
ودلوقتى هنجيب صينية وهننزل نص كمية المكرونة كطبقة اولى ونبدأ نوزع العصاج كطبقة تانية وننزل باقى المكرونة واخر طبقة هتكون الشاميل الى شيلناه فى البولة وبس كده هندخلها الفرن على درجة حرارة عالية لحد ما وش البشاميل يأخد اللون المتحمر الجميل وبس كده تكون خلصت وصفتنا
وبألف هنا وشفا بتمنى الوصفة تعجبكم 😊
دمتم بخير 🥰😊