فخدة ضانى
ده فيديو للوصفة كاملة بالتفصيل👇 الطريقة كاملة مكتوبة تحت برده😘
مقدمة
دايما في الاعياد والعزومات بيكون عندنا مشكله كبيره مع اللحمه الضاني وهي ان بيكون طعمها قوي وبيكون ريحتها نفاذه عشان كده فى موضوع النهارده ان شاء الله هعملها معاك بتتبيله لذيذه جدا وهتخلي الطعم معك مش ظاهر ان هي ضاني بالعكس كل اللي هيدوقها عندك هيحبها وولادك كمان هيحبوها واي حد ما بيحبش الضاني هيحبها هعملها معكم بطريقه كل اللي هيذوقها عندك هيحس ان انت جايباها من مطعم او من قريه بدويه هتحسي ان هي مختلفه تماما عن اي لحمه ضاني اكلتيها قبل كده تعالوا نعملها مع بعض
المقادير
نصف كوب عصير بصل
نصف كوب بشر طماطم
ملعقة كبيرة صويا صوص
ملعقة كبيرة باربيكيو صوص
ملح
نصف ملعقة فلفل اسود
ملعقة بابريكا
نصف ملعقة شطة
ملعقة زعتر
ملعقة بهار مخصوص
ملعقة روزمارى
ملعقة قرفة
ملعقة بصل بودر
ملعقة ثوم بودر
عصير ليمونة
2 ملعقة كبيرة زيت
2 جزر مبشور
ملعقة خل تفاح
نصف ملعقة قرنفل
ربع كوب ماء
ملعقة عسل نحل
ملعقة باربيكيو صوص
الطريقة
فى بولة هنضيف كوب عصير بصل و كوب بشر طماطم ومعلقة كبيرة صويا صوص غامقه ولو موجود عندك الفاتح هتديكي نفس النتيجه هنضيف معلقه كبيره باربيكيو صوص وهنبدأ نضيف البهارات ملح حسب الرغبة ونص معلقة فلفل اسود ومعلقة بابريكا ونص معلقة شطة ومعلقة زعتر ومعلقة بهار مخصوص و معلقة روزمارى ومعلقة قرفة و معلقة بصل بودر ومعلقة ثوم بودر و نص معلقة قرنفل و هنضيف عصيرليمونة و معلقتين كبار زيت ومعلقة خل تفاح وهنضيف عليهم جزرتين مبشورين وهنقلب كويس لحد مايندمجوا
دلوقتى جهزنا خلطة التتبيلة وهنبدأ نجهز الفخدة هنغسل الفخدة كويس جدا وهننشفها من المياه كويس وهنعلم فيها فتحات عشان التتبيلة تدخل جوه الفخدة و دلوقتى هننزل الفخدة فى صينية ونبدأ ننزل عليها التتبيلة و نسيبها بالتتبيلة اقل حاجة ساعتين ويفضل تسيبيها يوم كامل
ودلوقتى هنبدأ نغطيها بورق زبدة وعليه ورق فويل ونقفل عليها كويس عشان تستوى فى البخار بتاعها وهندخلها الفرن على درجة حرارة عالية لحد ما تستوى كويس جدا وتكون اللحمة دايبة خالص وهنبدأ نشيل ورق الفويل وورق الزبدة و دلوقتى هنجيب ربع كوب مياه وهنضيف عليه معلقة عسل نحل ومعلقة باربيكيو صوص ونقلبهم كويس وهنبدأ ندهن الفخدة بالخليط ده علشان تدينا طعم مسكر للفخدة وكمان تتحمر معانا وتدينا لون حلو ودلوقتى هندخلها الفرن عشان تأخد لون وبس كده تكون جاهزة معانا وتقدرى تقدميها
وبألف هنا وشفا بتمنى الوصفة تعجبكم 😊
دمتم بخير 🥰😊