كيك المانجو
ده فيديو للوصفة كاملة بالتفصيل👇 الطريقة كاملة مكتوبة تحت برده😘
مقدمة
بما اننا في موسم المانجا فأكيد لازم نعمل وصفات بالمانجا وطبعا زي ما انتم عارفين اسعار كيك المانجا مرتفع ازاي فالنهار هعملها معاكم بطريقه سهله وبسيطه ومش مكلفه خالص وفي خطوتين وبس وهتعملي لولادك احلى كيك مانجا ولو جالك ضيف هينبهر ان انت اللي عامله دي لان بجد طعمها زي بتاعه اشهر المحلات وبجد هي بسيطه جدا ومقاديرها متوفره في كل بيت ولو هنقارن سعر مقاديرها بسعر ان احنا نشتريها من بره فاللي احنا هنعملها في البيت هتكون زي اللي بره بالظبط ومش مكلفه خالص
المقادير
2 بيض
كوب الا ربع سكر
نصف ملعقة كبيرة فانيليا
نصف كوب زيت
نصف كوب لبن
ملعقة كبيرة خل
كوب ونصف دقيق
ملعقة كبيرة بيكينج بودر
2 باكيت جيلى مانجا
كوب ماء مغلى
2 كوب ماء مثلج
2 كوب كريم شانتيه
مانجا
الطريقة
اول حاجه هنجهزها في وصفتنا هو الكيك هنحتاج بيضتين بدرجه حراره الغرفه وهننزل عليهم بكوبايه الا ربع سكر ونص معلقه فانيليا سائله وهنضرب كويس جدا لحد ما يفوموا معانا ويكونوا باللون الابيض وطبعا احنا بنضرب السكر والبيض الاول علشان لو ضفتلهم اللبن والبيض من الاول مش هيديك الفوم الابيض الصحيح هننزل عليهم بنص كوبايه لبن ونص كوبايه زيت ومعلقه خل كبيره وطبعا الخل بيساعد على ارتفاع الكيك وكمان بيمنع اي زفاره تتواجد في الكيك هنضرب كويس جدا لحد ما المكونات تندمج كلها مع بعض الطريقه دي بتخلي الكيك معانا هش جدا وكمان بتخليه ناعم دلوقتي هنضيف كوبايه ونص دقيق منخول ومعلقه كبيره بيكينج بودر ورشه صغيره ملح وهنبدا نضربهم كويس جدا بس اهم حاجه يكون المضرب على اقل درجه علشان احنا مش عايزين الهواء والفوم اللي احنا عملناه يطلع من الخليط دلوقتي هنزل الخليط في صينيه مدهونه زيت و دلوقتي هنهزها تطلع الهواء الزياده وهندخل الفرن على درجه حراره 180 و طبعا اهم حاجه بتعمليلها اختبار عشان تتاكدي انها استوت على ما الكيك يبرد هنجهز باقي الوصفه هننزل في بوله باثنين باكو جيلي مانجا وهنضيف ليها كوبايه مياه سخنه وهنقلب كويس جدا علشان السكر يدوب كويس اهم حاجه تتاكدي ان السكر داب تماما واول ما تحسي ان السكر داب تماما هتبداي تضيفى كوبايتين مياه ساقعه من الثلاجه وهتقلبيهم كويس جدا علشان يندمجوا مع بعض وهو كده جاهز هنبدأ نعمل اخرام فى الكيك وهنضيف كوباية من جيلى المانجا الى جهزناه وهندخلها التلاجة لحد مانجهز الكريمة بوله هننزل بكوبايتين كريم شانتيه هننزل عليهم بنص كوبايه جيلي من نص كوبايه لكوبايه الا ربع وهتضربيهم كويس جدا ولو حسيتي ان هم محتاجين باقي الكوبايه فهتبدأ تضيفلهم باقى الكوبايه انما لو حسيتي ان هم محتاجين النص كوبايه بس او الكوبايه الا ربع فده شيء راجعلك على حسب السٌمك اللي انت حباه وكده تكون الكريمة جاهزة هنبدأ نقطع المانجا مكعبات اهم حاجة المانجا تكون مسكره و جامدة مش طرية ودلوقتى هنخرج الكيك من التلاجة ونبدأ نوزع طبقة الكريمة و بعد كده هنبدأ نوزع مكعبات المانجا ونضيف جيلى المانجا على الوش عشان نحافظ على المانجا متدبلش ولونها يتغير دلوقتى هندخلها التلاجة اقل حاجة 4 ساعات وكده تكون جاهزة للتقديم
وبألف هنا وشفا بتمنى الوصفة تعجبكم 😊
دمتم بخير 🥰😊