مربى الفراولة
ده فيديو للوصفة كاملة بالتفصيل👇 الطريقة كاملة مكتوبة تحت برده😘
مقدمة
بما ان الفتره دي هي موسم الفراوله هيصادف معاها رجوع الاولاد للمدارس فحابه اعمل معاكم اكثر حاجه هنحتاجها كحشوة للسندوتشات وكمان هنحتاجها لو حبينا نعمل زبادي بالفراوله واصناف كتير متنوعه هنعملها بطريقه سهله وبسيطه وكمان موفره واحسن من بتاعت الشركات
المقادير
كيلو فراولة
نصف كيلو سكر
نصف ليمونة
رشة فانيليا
الطريقة
هنبدأ ننضف الفراولة من الاقماع ونغسلها كويس وبعد كده هنبدأ نقطع الفراولة قطع كبيرة عشان لما تستوى يتبقى قطع فى المربى وهننزل الكمية كلها فى حلة وهنضيف عليها نصف كيلو سكر و عصير نص ليمونة ورشة فانيليا وبس كده هنقلبها ومش هنضيف مياه ولا اى حاجة تانية هو السكر اول مايلمس الفراولة هيبدأ يدوب وينزل مياه الفراولة هنحطه على نار عالية لحد ماتنزل المياه والسكر يدوب خالص هنهدى النار ونسيبه يغلى لحد ماتعقد معانا او سمكها يتقل وازاى تعرفى انها عقدت خلاص تنزلى نقطة من المربى فى طبق ويبرد شوية وتميلى الطبق لو المربى لسه سايلة جامد يبقا لسه معقدتش انما لو المربى بتتجرك ببطء فى الطبق يبقا كده جاهزة وبس كده ننزلها فى برطمان او علبة وندخلها التلاجة
وبألف هنا وشفا بتمنى الوصفة تعجبكم 😊
دمتم بخير 🥰😊